Ua faatolu nei ona tulai le tamaitai tusitala tala ma solo fatu o Papalii Sia Figiel i le faamasinoga e pei ona sa toe valaau i le Aso Gafua o le vaiaso nei lona moliaga o le fasioti tagata faamoemoeina, fasioti tagata pa’ivalea ma le umia o se aupega matautia, ae e lei tuuina atu lava sana tali i ia moliaga a leoleo.

O le vaiaso nei ina ua toe fofogaina lenei mataupu sa faailoa ai e le loia o Unasa Iuni Sapolu, ua faaui i tua le manao o lē o loo molia e lē manao i se loia.

Ua faaui foi i tua e le loia le tasi o talosaga e faasā pe tapu ai ona faasalalau nisi o vaega ‘anoa o mau e faasino i le solitulafono na faatino, ma ua totoe ai nei na o le talosaga mo se suesuega faafoma’i e saili ai aafiaga o le mafaufau o Papalii Sia Figiel, ona faato’ā iloa ai lea pe agavaa mo le tuuina atu o sana tali i moliaga.

O lea talosaga ua tolopo i le masina fou e tagofia ai ae se’i tapena le suesuega a foma’i o le mafaufau ona maua ai lea o se lipoti mo se iloiloga a le faamasinoga.

O loo nofo taofia pea lē o loo molia i le vaaiga a leoleo i le falepuipui i Tanumalala.