O le fale o le malo o Samoa o le STEC o loo i Otahuhu sa i lalo lea o le vaavaaiga a le afioga i le Minisita o Faatoaga ma Faigafaiva le afioga ia Hon Laaulialemalietoa Polataivao Fosi Schmidt, peitai e lei mamao atu nei ona iai fesuiaiga o Minisita o le kapeneta ia latou matagaluega e tatau ona tauave, ma o lea ua see mai ai le fale lea o le STEC a le malo i Otahuhu i lalo o le vaavaaiga a le afioga i le Minisita ia Hon Toeolesulusulu Cedric Schuster.
O le aso muamua o le masina fou, e amata ai matagaluega fou nei i lalo o Minisita e pei ona ta’ua.
O le taimi nei o loo tapuni le fale i Otahuhu e lē o toe faaaogāina, se’i faatali se tala mai i le malo poo le afioga i le Minisita ia Toeolesulusulu Cedric Schuster i le toe faaaogāina ai o le fale.
E le o manino i le taimi nei le toe faaaogāina o le fale, pe ono toe faaauau ai le ata tuai sa iai o le faaaogā lea e faatau ai oloa a le atunuu o loo auina mai i Samoa pe o le a iai se isi mea fou e faaaogā iai.
E fuafua lava i se faatonuga e tuuina mai e le malo poo le afioga i le Minisita.
Ae o le afioga i le Komesina o Faafetauaiga a Samoa i Aukilani le afioga ia Vaatuitui Apete Meredith o loo iai le vaaiga o le fale.
O nai masina e lei mamao atu na amata ai le afioga ia Vatuitui Apete i lona tofiga fou lea mai le malo, ma e taunuu mai o loo tapuni le lotoā ma le fale ae ua momoli atu ki o le fale i lona ofisa.
Ua mae’a ona asia le nofoaga o loo iai le fale e le afioga i le Konesula o Samoa i Aukilani ia Afemata Palusalue Faapo II faapea le afioga i le Komesina o Faafetauaiga ia Vaatuitui Apete Meredith ma ua iloa ai o se nofoaga lelei tele, ma o loo malupuipuia foi le lotoā ma le fale i le taimi nei ae o totonu o le lotoā o loo sima faasolo atoa e leai ni vao o sosolo ai.
Saunoa le afioga ia Vaatuitui Apete Meredith atonu e oo atu i le faaiuga o le masina o Oketopa ua taoto mai se fuafuaga a le malo i le toe faaaogāina lea o le fale o le STEC i Otahuhu.
