Ua mae’a nei ona folasia i luma o le faamasinoga o faigāpalota finauga e ala i folasaga a loia mo itu auai o le tagi tau palota a Falealili 1, e aofia ai ma folasaga mai loia a le ofisa o le Loia Sili o loo tauaveina le itu a le Komesina o faigāpalota ma lona ofisa, ma ua taatia atu nei i se iloiloga ma se faai’uga a lea faamasinoga.
O finauga sa autū i vaega e pei o le talia ma le faaaogā o mau tusitusia pe leai, mau ia ua mae’a ona faatauto ma tuuina atu i le faamasinoga, o le ā se gaioiga i se auala e faamasino ai moliaga ua faaalia i mau tusitusia ona ua lē oo atu tagata e molimau, a o ā malosiaga i ni aiaiga faaletulafono e mafai ai e le faamasinoga ona tagofia se matāupu ua lē auai tagata sa faatulaga e molimau.e
Sa faailoa i se vaega o le folasaga a le loia o loo tula’i mo le sui faipule o le itumalo, o lana silasila i le faatinoga o le pitolaau a le faamasinoga ma le tulaga o loo faafoe ai ana iloiloga, ua tulituli’aupū lava lē o loo ia tula’i ai ma ua pitotasi ma faaitu’au.
Peita’i na teena e le faamasinoga lea folasaga a le loia, ma faamanatu iai, sa tuu atu le avanoa e le faamasinoga ma fesili pe valaau ni ana molimau ae sa ia faailoa e lē o iai se faamoemoe faapea.
O lea avanoa na tuu iai ina ua na o le to’atasi le molimau a le itu tagi na oo atu a o isi uma molimau e le’i oo atu ma faatonuina ai loa i se poloa’iga molimau a le itu tagi e tatau ona auai.
Na taotaotua mai ai le tusi saisai e sa’ilia ai lea e oo mai i le taimi nei o molimau e to’alua sa mana’omia e le faamasinoga o se ulugalii mai Tafatafa Falealili, e le’i maua lava e leoleo.
O le a faimea faalogo loia a itu auai i le logo a le faamasinoga i se aso e aumai ai le faai’uga i taualumaga o lea faamasinoga tau palota.
