E solitulafono le tetee a tausi soifua o loo tapena mo a taeao, ma o loo faatali nei i se faaiuga a le faamasinoga pe tatau ona faataunuuina pea pe leai.
O tausi soifua a Gisborne e faapea e ui ina mama’i ae faigaluega lava, leai ni malologa ma ua leai se mautonu a o faia ai o latou tiute.
O molimau nei na faaalia i luma o le faamasinoga o galuega ananafi, peitai o loo tu malosi mai sui o le matagaluega o le soifua maloloina ma fai mai e solitulafono le tetee o loo faasauni iai mo a taeao, ma e tatau ona taofi.
O lea na ioe le Te Whatu Ora e moni o loo toagaogao le aufaigaluega, peitai na teena manatu e faapea e le o saogalemu mo se faigaluega.
A o finau mai ai le matagaluega o le taunuu o le tetee e tasi le itula a tausi soifua o le Ward 5 poo le acute medical a le falemai i Gisbone mai le ‘afa o le tasi i le aoauli agai i le ‘afa o le lua, e le o fesoasoani lea i le mafatiaga o loo iai le falemai, e le o malosi la latou finau e faatatau i le saogalemu o le aufaigaluega.
O le asō e maua mai ai se tali a le faamasino pe ono faataunuuina le tetee a taeao, pe leai.
