E le o pisa tele mai lava le Kāinga Ora i fale o aiga i Magele i Aukilani lea o le a tuu i lalo.
I ripoti a le leitio a Niu Sila o lea ua savali le masina o faatali nisi o tagata sa nofo totogi i fale nei o loo i lalo o vaaiga a le Kāinga Ora, pe fia sa’o le fuainumera o fale o le a tuu i lalo.
O fale nei na faaleagaina i lologa sa iai Aukilani, ma ao lē mautinoa ai fale o le a tuu i lalo i ripoti a le Local Democracy o loo taua ai e oo atu i le 15 fale.
I faamaumauga o fale na faaleagaina i le long weekend o le Auckland Anniversary e 560 fale a le Kāinga Ora, ma o le toatele foi ia o aiga aafia.
Maua e tala fou o lea o loo faia pea nei asiasiga i fale o le malo lea ua faaleagaina i Magele ma o loo faagasolo pea nei foi talanoaga ma tagata sa nonofo ai.
Ae mai le Monte Cecilia Housing Trust e pei ona molimau ai i tala a le leitio Niu Sila, e tatau i le Kāinga Ora ona vaavaai uma i itu talafeagai, poo onomea le toe faafou poo le tuu i lalo ae toe fau.
