Fai mai le Latitude Financial e na te le totogia le vaega tupe ua faatalosaga mai e i latou o loo i tua o le gaoi tele lea ua liki ai le tele o faamaumauga o ana paaga faapea isi pulega o loo latou galulue faatasi.
O le gaoi tele lea ua liki ai i tua le silia ma le tasi miliona o laisene avetaavale faapea tusifolau o tagata Niu Sila, ese ai ma isi faamaumauga.
O le Kiwibank o lea foi na aafia atu ai ma le silia ma le 2000 o ana paaga e iai sootaga ma le Latitude.
A o fai mai ai le augaoi e totogi tupe atu ona le toe faailoa lea o faamaumauga o le toatele o i latou ua aafia, e le o iai se faamaoniga e mafai ona talitonuina ai ma e le o faailoa faalauaitele mai foi e le pulega pe fia se tupe na aisi mai ai.
Peitai, e le o lava le leai a le Latitude Financial e pupuni ai le telē o le faaletonu ua aafia ai le toatele o faamaumauga o tagata Kiwi, faapea ai nisi i Ausetalia ma ua fai mai ai le New Zealand Privacy Commissioner o lea lava e faatali i se tala mai le Latitude e tusa ma le mea ua tupu.
Muamua e faafefea ona sao mai le augaoi ma gaoia faamaumauga atoa ai ma le fesiligia pe aisea na o latou taofiofia ai pea le tele o faamaumauga a paaga mo lea taimi umi.
Ua toe fai mai ai ma le komesina i tagata uma ua aafia e faaulu faaseā i lo latou ofisa atoa ai ma le fai ma siaki teugatupe atoa ai ma credit records pe e lei aafia ai.
