O le amataga o lenei vaiaso fou o le a faailoa ai e le tamaitai Palemia le afioga Fiame Naomi Mataafa, le faamutaina o le tofi Peresetene o Faamasinoga o Fanua ma Suafa, lea sa tauave e le afioga Fepuleai Atilla Ropati.

O le Aso Tofi ua mavae e pei ona faailoa mai e se molimau faatuatuaina, na tuuina atu ai le tusi a le Palemia i le Peresetene ma logo iai le faamutaina o lona tofiga ina ua mae’a ona toe saini le aao o le Ao o le Malo, afioga Tuimalealiifano Vaaleto’a Sualauvi II, i tulafono na pasia e le Palemene ia Tesema o le tausaga e 2020, ina ua mae’a ona toe faatulaga nisi o vaega o le tulafono fou o fanua ma suafa sa tulai mai ai ni feteenaiga ma vaega sa pasia e le Fono Aoao Faitulafono.

O le a iloa i le saunoaga faalauaitele mai le taitai o le Malo, mafuaaga o le faamuta o le toe tauaveina o le tofiga Peresetene o Faamasinoga o Fanua ma Suafa e le afioga Fepuleai Atilla Ropati.

Ua laumanuia i se lipoti a le nusipepa o le Sunday Samoan, le faatauto i le ogatotonu o le vaiaso nei o se tasi o faamasino sinia o le Faamasinoga Maualuga le afioga Lesatele Rapi Vaai, e na te tauave le tofiga Peresetene o lea faamasinoga tāua a le atunuu.

O le aso muamua o Aokuso o le tausaga e 2016 na faatauto ai Fepuleai Atilla e tauaveina lea tofiga tāua ma taualoa.