E lei taofia e le Malo o Samoa le avanoa o o tatou tagata i le polokalame nofomau a le Malo o Ausetalia, lea ua faatulaga e amata tatala talosaga i le masina o Iulai o le tausaga nei.

Ua faailoa lea tulaga e le Minisita o le matagaluega o tupe a le Malo ua vaaia foi le polokalame o galuega faavaitaimi i Ausetalia ma Niu Sila, ina ua maua iai se feiloaiga i le vaiaso nei.

Faaalia e le afioga Lautimuia Afoa Uelese Vaai, o se polokalame tāua tele, peitai e iai atugaluga o le Malo i le mamulu atu ai ma o tatou tagata e umia tomai faapitoa, ma aafia ai le tamaoaiga o le atunuu.

O le faitotoa o loo matala pea ia Samoa i lea polokalame nofomau ae ua faaalia e le Minisita o loo mata’itu se taimi e maua ai le atoaga o fuafuaga a Ausetalia o loo i totonu o lea polokalame.

Le Minisita o le matagaluega o tupe ua iai ma le polokalame o galuega faavaitaimi, afioga Lautimuia Afoa Uelese Vaai.