Ua tapena nei pulega o pisinisi o fale apitaga tu matafaga i Lalomanu Aleipata e faatalatalanoa se fofo i le eseese o tau e faaaoga ai matafaga mo tafaoga e le gata o tulisi poo malo mai fafo, ae o le mamalu o le tatou atunuu.

Ua faailoa lea fuafuaga i se faamatalaga faalauaitele mai le Pulega o Tagata Tafafao mai i Samoa, ona o se ata video ua salalau i luga o le api o foliga o loo aliali ai se finauga a se tasi e ana se nofoaga o fale apitaga tu matafaga, ma ni tulisi i le totogi e faaaoga ai le matafaga mo se tafaoga.

Mo le silafia e lo tatou atunuu o se tasi lea o faafitauli e tupu pea i soo se tausaga o le eseese o totogi a nisi o nofoaga e lolofi iai tafaoga, ona e ese le totogi o le taavale e tu i le matafaga, ese le totogi o le fale.

O nisi o nofoaga e feololo le totogi, a o nisi e matua le talitonu lava i le maualuga o le tau e faaaoga ai se fale faapea vaega uma o loo maua i se nofoaga e tafafao ai.

O le mapuna mai i fafo o le finauga a ni tulisi ma se tama tane matua i le totogi e faaaoga ai le matafaga, ma saili ai loa se fofo i se faiga e laugatasia ai le totogi e faaaoga ai matafaga mo tafaoga ma taelega i le sami,

Ua fetaui lelei ma le agai atu i le faaiuga o le tausaga i le taimi o aso fiafia o le Kilisimasi ma le Tausaga Fou, aua o nofoaga ia e tumutumu iai aiga, ma autalavou a ekalesia e faia ai malologa ma tafaoga, ma inuinu ai foi sina tasi pe lua aua o le taimi o aso fiafia, aemaise o lea ua tatala noataga o puipuiga sa tatou feagai ai i le lua tau o le saga ua mavae ona o le faama’i.

Faaalia e le pulega o tagata tafafao itu sili ona tāua i le taimi lenei ua toe malaga mai ai tagata tafafao mai fafo o le li’oli’o ma puipui i le igoa tauleleia o Samoa, aua o le salalau o lea finauga i luga o upega tafailagi e momoli atu ai se tala lē manuia i le lalolagi e aafia ai le lumanai o le atina’e o tagata tafafao mai i Samoa.