Ua mae’a faatalanoaga a sui o matagaluega o le Malo o aofia i le polokalame o nofoaga apovai o le vaitafe o le Vaisigano, o loo faatupe e le vaega e ta’ua o le Green Climate Fund poo le GCF, i le faamoemoe e faapipii ni sailini faailoilo e logoina ai nuu o loo tu lalata i ia nofoaga, i taimi o tafega ma lologa.

O ia sailini faailoilo o le a faapipii i le Apia Park i le afioaga o Moataa, o le nofoaga o le fale eletise maua i le suavai i Tanugamanono ma le nofoaga o loo iai le ofisa autu o le Matagaluega o A’oga Taaloga ma Aganuu i Malifa.

O le polokalame lenei o loo faatautaia e le Matagaluega o Puna’oa Faalenatura ma Siosiomaga, ae lagolago iai le matagaluega o Tupe a le Malo ma le Matagaluega o Tina ma Tamaitai Atinae o Afioaga ma Aga Fesootai.

E 14 nuu ma afioaga i totonu o laufanua apovai i Vaisigano na autu iai faatalanoaga e pei o Moataa, Faatoia, Vinifou, Levili, Vaiala, Vaipuna ma Maagiagi.

O nisi o ia nuu na matua afaina i lologa ma tafega tetele ia Tesema o le tausaga e 2012.