O le afioaga o A’ufaga i le itumalo o Lepa i le afifio o le paia o Aiga, afifio o Tupuola ma le Matua o Tago, afifio foi o le Faletolugafua o le Usoalii, ma le alalatai o Popo, Talimao ma Salefao, na faaee ai le suafa Tootoootumua, i le taitaifono o le pulega aoao o le taaloga lakapi i le lalolagi ina ua usu faaaloalo le paia o le nuu, aemaise o le auai o le taitaifono ma le pulega o le Lakapi a Samoa sa latou molimauina le faafotutupu i le Aso Lulu o lenei vaiaso.
O le tasi lea o polokalame o le taligamalo a le Lakapi Samoa i le asiasi mai i Samoa o le taitaifono o le lakapi a le lalolagi ua faaaloalo ai i se matu palapala e ala i le faaeeina o se suafa matai, e pine faamau ai le malaga mai i lo tatou atunuu o le faauluuluga o le pulega o lea taaloga i le lalolagi.
Sa feiloai le afioga Tootoootumua Sir Bill Beaumont, i le taitai o le Malo le afioga i le tamaitai Palemia, Fiame Naomi Mataafa, ma ia asia foi le nofoaga autu o le pulega o lea taaloga i lo tatou atunuu.
O le faaiuga o le vaiaso ua faamoemoe e toe taliu ai le faigamalaga.
