A o lipotia ai le pipisi o le faama’i tale vivini poo le whooping cough o pepe ma fanauiti i nisi o atunuu o le Pasefika e aofia ai Niu Sila, ua faamaonia mai e le matagaluega o le soifua mālōlōina i Samoa le aafia o se pepe fitu vaiaso le matua i lea faama’i, ma o le pepe e lei faia ni ona tuipuipui.
O le tale vivini o se tasi o faama’i o loo fautua mai ai pea le auaunaga a le soifua mālōlōina i Samoa i le tāua o le ave o pepe e fai tuipuipui ina ia puipuia ai aemaise o isi faama’i e pei o le mami, rupela ma le misela.
Ua faailoa e le matagaluega o le soifua mālōlōina i se pepa o faasalalauga faalaua’itele, o āuga o lea faama’i e amata i le flu e pei o le tafe o le isu sosoo ai ma le tale e iai le si’uleo ii i le faai’uga lea e mafua ai ona ta’u o le tale vivini.
O Niu Sila ua lipotia le faamauina o gasegase o le tale vivini i le 263 talu mai le masina na te’a nei o Oketopa, ae i Samoa o loo mata’itū pea e le auaunaga a le soifua mālōlōina lea faama’i e ui e to’atasi le pepe ua faamaonia le aafia ai lea ua faasolosolo manuia.
