O nuu mulimuli na pogisa mai le iva anapo e oo mai i le tasi o le vaveao o le Aso Lua o lenei vaiaso o afio’aga ma alalafaga ia i nisi o vaega o le motu o Upolu.
Na toetoe foi o nuu ma afio’aga uma o lea motu na motusia iai le eletise i le Aso Gafua ona o se faaletonu i se tasi o afi i le fale eletise o loo i Fiaga.
Na faaalia e le pulega o le faalapotopotoga o le malosi tau eletise le EPC i se faasalalauga, o le mafuaaga lea o le tau faasoa o le eletise i vaega eseese o Upolu i le amataga o le vaiaso ona ua lē mafai e afi eletise o loo maua ai lea auaunaga ona tali atu i le mana’oga tau eletise i Upolu.
Ae na avea lea tau faasoa o le eletise ma faatiga ulu i le to’atele na faaleo i luga o auala o fesoota’iga televavave o latou manatu, ona ua afaina nisi o meatotino e alu i le eletise i le pe faafuase’i o lea auaunaga tāua.
O pisinisi foi ma galuega masani na faaletonu ai, ae sa fautuaina e le malosi tau eletise pisinisi ma aiga e faaaogā afi faaleoleo pe afai o iai ina ia faaauau ai pea ona maua le eletise ma faatalitali ai le taimi e toe faafoisia ai lana auaunaga masani.
