O le tamaitai o Naila Tyner o se missionare Amerika lea na mua’i faamaonia le aafia i le Koviti19 i totonu o Samoa i le Aso Tofi 17 o Mati 2022 ua faasoa ona lagona i tulaga ua iai nei talu ona faanofoesea.
O le itula e 4:57pm o le aso ananafi Aso Sa 20 o Mati na fai ai se faailoa ai e lenei tamaitai i luga o le Facebook faamaonia ai o loo faanofoesea o ia ina ua liki i tua faamaumauga faatatau ia te ia ma tulaga faateia na oo ia te ia ina ua oo atu le tala ua aafia ao agai ai e fai lana siaki fuafua e toe foi i lona atunuu.
Taua e Naila o ia o se sitiseni Amerika ma na fai lana suega poo le test ina ia mafai ona oso i luga o le vaalele peitai e maua mai le iuga o lana suega ua faamaonia le aafia o ia, na ia taua matuā faateia ona e le’i iai sona manatu o le a tupu se mea faapea.
“I tried to go home, I’m an American citizen and got a Covid Test so I can get on the plane and tested positive… it was definitely a shock and I was not expecting what happened “.
“It took a minute to process and I knew immediately once when they told me I was positive what that would mean and how that would blow up”
Taua e lea tamaitai sa nofo tatalo i le Alii i lea po ina ia fesoasoani atu ia te ia ona ua ia iloa le tele o le tusitusi lima ma upu faifai o le a fai atu ia te ia e ui na te le’i avatua se faama’i i Samoa ma e le’i fealuai foi pe malaga ese ma le atunuu talu ona aafia le lalolagi i le Koviti.
Na faaali foi le lē fiafia o lea tamaitai i le salalau ai o ona faamaumauga ma ia tuuaia ai le Ofisa faasalalau a le Samoa Global News e faapea na o latou faalauiloa uma ona faamaumauga ae le gata i lea ua lipoti e le SGN ua aafia uma tagata o le falemai ona o ia. Na taua foi e Naila e le’o mautinoa foi pe na aafia o ia i le koviti mai le falemai. Na tali le tamaitai pule o le SGN ia Tuiloma Sina Retzlaff e leai ma se tulaga faapea na tulai mai ma e lei lipotia foi e le SGN ni faamatalaga faapea ua aafia uma tagata o le falemai ona o Naila Tyner.
Na faailoa foi e Naila i le video na tuu i luga o le facebook o loo faasolosolo manuia ma e leai se tulaga matuā aafia i auga o le faama’i ma na ia faafetaia foi le lagolago a le toatele o loo sasaa atu o latou moomooga alofa ma le lagolago talu ona faanofoesea o ia.
