O le afiafi ananafi na silasila ai ma faafofoga le atunuu i se saunoaga faapitoa mai le Malo, e pei ona fofogaina e le afioga i le Sui Palemia, Afioga Tuala Tevaga Iosefo Ponifasio.
O lenei faasilasilaga faapitoa e faasino tonu i le mataupu o se faalavelave na tulai mai le po o le aso 21 o Aperila 2021 i Vaitele, e faapea o se taimi o le vaveao na lavea ai se tama talavou e igoa ia Tuau i luga o le auala tele o Ma’ali St, ina ua so’a e se taavale ma maliu ai.
Ma o se mataupu o loo tuliloaina pea e le mamalu o le atunuu, ona o se tulaga maoa’e o le maliu o se tagata ae ua tusa ai ma le lua tausaga e lei mafai lava e leoleo ona tuuina mai se faamatalaga i se tulaga aloaia poo se tulaga ua oo iai le latou suesuega pe faapefea ona tupu lenei faalavelave ae o ai foi ua masalomia na tupu ai lenei faalavelave ua mafua ai le maliu o Tuau.
Saunoa Tuala, o le tulai mai o se mataupu faapea, ua lē nofonofoa’i le Malo ona e silasila le Malo i le aotelega o mataupu faapenei o loo aofia ai le faatinoga o tiute ma galuega o loo tauave e se matagaluega a le Malo.
Ma afai ua fesiligia e le atunuu le faamaoni o le auaunaga a soo se itutino o le Malo, ua tatau loa ona saili le Malo i ala o le tulafono e fesoasoani ai i se mataupu ua tulai mai, a o fea o tulai mai ai, o ai o aafia, aisea ua to’a ai se mataupu, aemaise se faaletonu o se auaunaga pe a aafia le atunuu.
O lenei mataupu e pei ona saunoa Tuala, e lagona le faanoanoa ma le manatu alofa ina ua tulai mai, ona e le gata o se faalavelave ua maliu ai se tagata, ae ua silia ma le lua tausaga e lei maua lava se faamatalaga maumaututū mo i latou o loo mafatia pea ona o sē pele ua toesea.
Na momoli ai foi faamaisega a le afioga i le Sui Palemia i mātua ma le aiga faanoanoa.
Saunoa Tuala, ua manatu le Malo, e le tatau ona to’a le suesuega, ma ona o le tele o le taimi ua alu, ua tuuina atu ai e le Kapeneta i le Loia Sili ina ia tapena mai se fautuaga i le Kapeneta i se taimi vave e faasino tonu i le mataupu lenei mo se agai i luma, e aofia ai vaega nei:
- Le vave iloiloina o le faila ma mau ma faamaumauga uma o lenei suesuega o loo i leoleo i le taimi nei, ma tuuina mai se fautuaga manino i le Kapeneta i le tulaga manino ua oo iai lenei mataupu.
- Le silasila i le talafeagai ona faatuina se vaega faapitoa o leoleo mai fafo latou te tauaveina le suesuega e faapitoa i lenei mataupu ma isi mataupu e aafia i lalo o lenei faalavelave.
- O lenei faiga, o le a lē aafia ai tofiga ua iai a le matagaluega o leoleo, ae o le a patino lava i le suesuega o le mataupu lenei.
- O le a faaauau pea le lē auai le afioga i le minisita o leoleo ma falepuipui i lenei mataupu, ona ua mae’a ona ia faailoa lona piitaga i lē o loo masalomia na tupu ai lenei faalavelave.
- Se fautuaga mo le puipuia o molimau o loo fia fesoasoani mai i lenei suesuega.
- Ia faatino pea auaunaga masani a leoleo mo le atunuu i lalo o le vaaiga a le alii komesina ma le pulega o loo iai nei, ma le afioga i le minisita o leoleo, ia Faualo Harry Schuster.
- Se puipuiga i afioga i alii minisita o loo aafia i le folafolaga taufaamata’u i o la soifua o loo ta’ua i se tasi o molimau o loo aafia i lalo o lenei suesuega.
O le faatalosaga a le Malo ina ia maua pea le to’afilemu o finagalo o le atunuu, ae ia fesoasoani atu pea i lenei suesuega e ala i le tuuina atu o faamatalaga manino ma le moni.
Na ia fautuaina foi le mamalu o le atunuu ina ia faaitiitia le faasalalau o faamatalaga eseese i luga o upega tafailagi ma le tusi o foliga, e ono aafia ai ma taitaiseseina ai le suesuega ma atili tuai ai le suesuega o loo faia.
