I se lipoti aupito lata mai i le fonotaga a ta’ita’i o le Pasefika i Suva i le vaiaso nei ua ta’ua mai ai ua iai foi nisi ta’ita’i o le Pasefika ua faasee ese ma le fonotaga. Ta’ua mai e le RNZ Pacific ua faaitiitia pea le aofai o sui auai o le fonotaga ina ua agai ese foi le peresetene o le atu Malasala ma le Palemia o le Atu Kuki.
Faaopoopo atu lea o loo lipotia foi e lē o auai le ta’ita’i o Nauru ona o loo malosi le pepesi o le koviti i lona atunuu. O le Palemia o le Atu Kuki, Mark Brown lea ua faasee ese foi ma le faamatalaga o loo fia taulai le silasila i le sauni atu a lona atunuu i faigapalota lea e faia i le tolu vaiaso o muamua.
O David Kabua le peresetene o le Atu Malasala poo le Marshall Islands ua ia faailoa foi i le lipoti lava lea sa ono auai i le fonotaga peitai ua lē mafai ona o se tasi o tulafono o loo iai e aveesea mai ai le atunuu o se sui o le Forum.
O isi atunuu e lima mai le Atu Maikorenisia e aofia ai Palau ma le Federated States of Micronesia, o i latou ia e atoa iai le to’alima o atumotu mai le Maikorenisia sa iai popolega i le faatūina o le sui mai le Atu Kuki, Henry Puna e avea ma failautusi aoao o le Pacific Islands Forum.
