O le aso ananafi lea ua faasilasila aloaia mai ai le faasee ese nei o le afioga i le alii faipule, o ia foi sa avea ma minisita o mataupu tau tagata Pasefika, afioga Aupito Su’a Tofae William Sio, mai ona tofiga faaminisita uma sa ia tauaveina.
O le afioga ia Aopito faapea le tamaitai o Poto Williams, lea na faailoa ananafi lo la faasee ese mai o la tofiga faaminisita sa galulue ai.
Mo le afioga Aupito lava ia, e aofia uma ai ona tofiga faaminisita o tagata Pasefika, minisita o faamasinoga, faapea tofiga faaminisita lagolago mo le matagaluega o aoga, mataupu tau i le va i fafo, ma le soifua maloloina.
I se faamatalaga na faalauiloa mai le itulau o le facebook a le Labour Pasifika Caucus, o loo ta’ua ai le tele o ni galuega ma mea na ausia e le afioga Aupito a o tulai mai aemaise lava i lona tofi faaminisita mo mataupu tau Tagata Pasefika.
O lona vaitaimi na molimauina ai le tele o fesoasoani tau tupe na faamatuu atu e le faigamalo e faatupe ai le tulaga tau soifua maloloina o tagata Pasefika, o a’oa’oga ma le faafaigaluegaina o tagata Pasefika o loo iai i totonu o Niu Sila.
O le tulai malosi mai foi o le afioga i le alii minisita e lagolago soo se mataupu tau tagata Pasefika, na taunuu ai i le faatinoga o le ifoga poo le faatoesega a le malo Niu Sila e tauala atu i lona taitai le tamaitai Palemia, Jacinda Ardern lea na pulou ai i le ie o le malo e faaali atu ai lagona masiasi ma le salamo o le malo ma ona ta’ita’i ona o mea na tutupu mai taimi ua tuanai na faileagaina ai tagata Pasefika aemaise lava Samoa, le Dawn Raids Apology.
E le gata i lea o le tele o fesoasoani tupe na faasafua solo i vaega eseese mo le tapu’eina o tomai o tagata Pasefika i totonu o Aotearoa i itu tau a’oa’oga, o galuega ma le soifua maloloina e pei foi ona vaaia i le taimi o le pepesi o le Koviti-19 i fesoasoani na maua, ae le gata i lea o le lagolagosua i fanau talavou a le Pasefika, lea na ofoina ai le tele o ni avanoa faasikolasipi mo le aotauina o i latou i tomai ma matata eseese.
O le masina o Tesema i le tausaga na tea nei na faailoa mai ai le faamavaega a le afioga Aupito o le a lē toe tauva i le tofi faipule o lona itumalo faapalota o Magele, ma i sana saunoaga i luga o le Radio Samoa i lana taimi masani i taeao o Aso Faraile taitasi, na ia momoli ai lana faafetai i lona aiga, i si ona faletua ma le nofoaalo, i le latou lagolago ia te ia ma le tele o faataulaga sa latou faia a o tuu atu atoa lona taimi i le faatinoina o lona tofi faipule mo lona itumalo aemaise le atunuu atoa.
O le Afioga Aupito Tofae Su’a William Sio na amata ona avea ma sui faipule o le Palemene a Niu Sila talu mai le tausaga e 2008, ma e tusa ma le 6 paeaiga na tulai mai ai Aupito i totonu o faalagamaea o upufai a le malo Niu Sila.
