Na faanatinati ona faatino se galuega lavea’i a fesoasoani muamua i le taeao nei mo se alii na pa’ū ese mai le vaa la’upasese, na tuua le motu o Waiheke mo Aukilani.
Ua lipotia mai e le New Zealand Herald, na tula’i lea faalavelave i le taeao poo le ta tonu o le itula e 7 ma na toe liliu ai lava le vaa mo Waiheke ae aga’i atu ai loa leoleo ma le taavale lavea’i poo le ambulance e tali atu i lenei mataupu.
Na maitauina le valaau ane o se tasi o sui o le ‘auvaa, le pa’ū ai o se pasese mai le vaa, ae na ta’ua e se tasi o pasese, e fai lava sina faafaigatā ona taumafai e lavea’i mai le alii.
Ua faamauina foi le taumafai ai o le ‘auvaa e lafo i lenei alii ni pa’u laveai poo circle lifebelts e iai ni molī e fesoasoani ia te ia.
Na ta’ua le fautuaina o le pasese ina ia mālōlō i totonu o potu mālōlō o le vaa a o taumafai e lavea’i mai lē ua pa’ū.
Faamauina e le’i vaaia ni foliga popole o le alii, i le taimi na faatino ai galuega lavea’i a fesoasoani muamua.
E ui i le faafaigatā o taumafaiga e lavea’i lenei alii, ae ua faafetaia le mafai ona lavea’i mai ma faasaoina le soifua o le pasese na pa’ū mai le vaa.
Puna o Faamatalaga: https://www.nzherald.co.nz/nz/auckland-ferry-incident-rescue-operation-underway-after-man-overboard/IRHBUGWHWBETFKGHNMNHCCBUAA/
