Atonu o se faamanatu mo avetaavale uma se lipoti ua faailoa i le alaata 7 a Ausetalia i le asō e faatatau i faasalaga e ono faasala ai avetaavale e paka a latou taavale i vaega ua faaavanoa mo taavale e alu i le eletise, electric vehicles.

Ua faailoa i lea lipoti e oo atu i le $3,200 le sala ma e faia i setete uma e fā ma teritori i Ausetalia.

O ia faasalaga na amata faaopoopo i le faaiuga o le tausaga talu ai e pei ona ta’ua ma sa faia faatasi lava i le taimi na faailoa ai isi tulafono i Niu Sa Uelese e faatatau i faasalaga mo avetaavale e latou te polokaina nofoaga e fafaga ai taavale eletise ma e ono faasala i le oo atu i le $2,200.

Fai mai le faamatalaga o le mamafa o faasalaga o le a unaia ai avetaavale e alofia le solia o lea tulafono, ma ua valaau nisi ua alagatatau ona faia ni faailo i vaega ia e paka ai nei taavale, ma fafaga ai foi ia faamanatu ai i isi avetaavale e le tatau ona o latou afea ia vaega.