E $1.9 miliona se faasalaga tupe ua tuuina i se tasi o auaunaga tau le NDIS, poo se NDIS provider ona o le mataupu ua maliu ai se tagata e iai aafiaga tumau ina ua poloka lana mānava a o tausami.

Lipotia e le Alaata 9 o le tamā lea na maliu i le masina o Me 2020 i le tolu o aso talu ona fafaga e le aufaigaluega a le nofoaga sa tausia ai, le auaunaga lea a le Valmar Support Services i le faaitu o Richardson i Canberra.

Ua ioeina e le auaunaga lea tulaga sa maitauina ua lape ai le auaunaga e pei o le lē lelei ona toleni o lana aufaigaluega.

O le Aso Lulu o le vaiaso nei na faia ai le faai’uga a le faamasino o Elizabeth Raper e tatau ona totogi e le kamupani lea le $1.9miliona ona o le solia o aiaiga e 24 o tulafono e faatatau i le faatinoina o auaunaga ia mo le NDIS.

O le faasalaga aupito telē lea ua tuuina i se mataupu faapea ae fai mai le faamasino e itiiti le vaegatupe ua faasala ai pe a faatusa i le ogaoga o aiaiga ua solia ma le i’uga ua oo iai lenei mataupu ma le soifua ua ma’umau.

O lē ua maliu ua lipotia e lē gagana ma e iai aafiaga tumau ma aafia foi i le gasegase o le suka ma o aafiaga o gasegase sa aafia ai na faatonuina ai foi le faavaivai pe faaitiitia vaega o ana taumafa pe a saunia ina ia faafaigofie ai lona taumafaina.

E lē o iai se tali a le Valmar Support Services o ta’ua i le lipoti e ui sa tuuina le avanoa e tali ane ai.

Puna o Faamatalaga: https://www.google.com/amp/s/amp.9news.com.au/article/b2419590-b5ca-49e8-ae4e-ad8dc0c7e911