Ua atoa nei le vaiaso talu ona tuli le faasalaga faafalepuipui e 15 masina o le tamā e 47 tausaga le matua o Nicky Ah Kuoi o Talimatau, Sapapalii ma Tulaele, ina ua faamaonia lona ioeina o moliaga o le umia o le pauta faasāina o le ‘aisa, umia o maruana ma le umia o fasi paipa uga e fā i le faamoemoe e faaaogā i se gaioiga solitulafono e fesoota’i i nakoti poo pauta ma laau faasāina.
O le osofa’iga a leoleo i le masina o Iulai o le tausaga nei i se fale o se aiga i Vaitele fou lea na faaaogā ai se ta’ifau sosogi, na maua ai nakoti ua molia ai Nicky lea o loo molia ai foi se isi tagata na maua faatasi i le osofa’iga.
O lē ua faasalaina sa tuli muamua sona faasalaga i le falepuipui e 4 tausaga i le solitulafono o le fasioti tagata pa’ivalea.
O Nicky Ah Kuoi o se tagata faipisinisi e iai ona tomai a’oa’oina i le faaleleia o afi o taavale, ma o le fautuaga lea a le faamasinoga, ia faaaogā ona tomai pe a mae’a tuli lona faasalaga, ma ia auai i se polokalame e taumafai ai e momotu lona fiafia i le pauta faasāina o le ‘aisa, lea sa ia faailoa i le faamasinoga o ia o se tagata ua 16 tausaga o ia faaaogā lea ituaiga o nakoti.
