Ua faia e le pulega o le kamupani vaalele o le Samoa Airways ni faasalaga e pei o le faamalolo lē tumau o nisi o lana aufaigaluega ona o ni pasese sa malaga i le kamupani vaalele mo Amerika Samoa ae leai ni pemita e ulufale ai i le teritori.
Ua faailoa e le Pule lē tumau o le Samoa Airways i se lipoti a le nusipepa o le Samoa Observer, e lē gata ina faasala ia tagata faigaluega ae ua faia foi ni a latou aoaoga e toe faamalamalama ai vaega e ao ona latou silafia mo ni pasese e fia malaga i le auaunaga a le kamupani vaalele, ina ia tausisia tulafono faavaomalo aemaise lava o aiaiga o tulafono tau femalagaa’iga.
E pei ona silafia na faasala e le faigamalo a Amerika Samoa le Samoa Airways i se sala tupe e tasi le afe lima selau tālā Amerika ona o ni pasese se toalua na malaga mo Tutuila i le auaunaga a le kamupani vaalele ae leai ni pemita faataga e ulufale ai i le teritori.
O le tasi o ia pasese o se sui faipule o le Palemene ua faamuta lona tofi minisita lagolago ona o lea tulaga na aafia ai.
Ua faailoa e le pule lē tumau o le Samoa Airways i lea lipoti ua mae’a ona totogi le sala tupe a le kamupani vaalele.
