Na savavali ese mai tusitala ma le aufaasalalau mai le faitauga aloaia o le palota laitiiti a Vaimauga 3 ina ua le faatagaina ona ulufale e molimauina le faitauga aloaia o le palota.

O le faasāina na afua mai lea i le ofisa o le Komisi o Faigapalota a le atunuu.

E aofia ai i tusitala le Peresitene o le Asosi a Tusitala i Samoa le JAWS le susuga ia Lagi Keresoma lea na ia faaalia ia tatou tala e faapea, o le faasāina o le Media mai le molimauina o le faitauga faapitoa ua le o se tulaga tatau lea ma tu o Faigamalo Faatemokalasi ma e le faavaea ia tulaga.

Sa ia faapea mai poo ai lava na ia faia le tulaga ua faaalia manino mai ai lona faatuanai ai lea o le tiute tāua o le Fourth Estate i soo se faigamalo o pulega faatemokalasi.

Na ia ta’ua foi o le auai ai o le Media i le faitauga o palota o le ogatotonu lea o faimeatonu i soo se faigapalota, ma o le faasā ai o le Media mai le faatinoga o lona tiute ua le gata ina taofia ai le agavaa o tagata lautele e maua ai faamatalaga ae ua fesiligia ai foi le faamaoni o le faiaga o le palota.

Sa fesootai nisi o le autusitala i le alii minisita o loo fegai ma le Ofisa o Faiga Palota peitai sa faateia le alii minisita i lea tulaga ma ia fesootai ai loa i le ofisa e faataga le Media peitai ua tuai ua savavali ese tusitala ma le aufaasalalau i lea taimi ona ua leva ona faatalitali.