O le Aso Tofi ananafi lea na faamautūina ai le faai’uga mai le komiti o taaloga a le Olimipeka, ua faasāina ai nei ma lē taliaina ona toe tauva ni alii na faia ni o latou ta’otoga ina ia avea ma tama’ita’i, i soo se vaega o taaloga a tama’ita’i i le Olimipeka.
O lea faai’uga ua faia ina ua malilie le komiti a le Olimipeka le IOC i le ta’iala fou mo agavaa e taalo ai se tasi i ia taaloga tetele a le lalolagi, ma ua ogatusa ai foi ma le poloa’iga a le Peresetene a le Iunaite Setete, Donald Trump, i taaloga ia o le a faia i Los Angeles i le 2028.
Soo se taaloga lava e tauva ai ni tama’ita’i i le Olimipeka, pe tauva ta’ito’atasi pe tauva faatasi o se ‘au, o le a matuā lē toe taliaina le tauvā ai o se transgender ae o le a talia lava na o tama’ita’i moni poo biological females, e faamautinoa mai i se su’esu’ega e faia gene o lena tagata taalo.
E lē o manino mai le taimi nei pe to’afia ni tama’ita’i faapena pe afai o iai nisi o loo tauva i taaloga a le Olimipeka.
E le’i iai se tama’ita’i faapena na tauva i taaloga o le Paris Summer Games lea na fai i le 2024, e ui o lea sa iai le tama’ita’i taalo siisii u’amea mamafa a Niu Sila, Laurel Hubbard lea sa tauva i le Tokyo Olympics i le 2021 ae le’i manumalo ai i se pine.
I se vaega o le lipoti a le IOC o loo ta’ua ai, o lenei ta’iala mo le agavaa lea o le a amata faaaogā i le LA Olympics ia Iulai o le 2028, ua faia ina ia puipuia ai le tulaga talafetaui (fairness), le saogalemu (safety) ma le faamaoni (integrity) i le vaega o loo taaalo ai tama’ita’i.
O se faai’uga e lē o taliaina e tagata uma, ua matuā fiafia le au lagolago fai mai ua talafeagai lelei mo le puipuia o tama’ita’i taalo, ae mo le au tetee, o loo finau e le’i lava ni su’esu’ega faasaienisi na faavae ai le faai’uga, ma ua lamatia ai foi avanoa mo tama’ita’i talavou afeleti, transgender female athletes ma lo latou lumana’i taaalo.
Puna o Faamatalaga: https://www.1news.co.nz/2026/03/27/transgender-women-athletes-banned-from-female-olympic-events/
