Ua sauni le faamasinoga e faia se faasalaga faafalepuipui i soo se tasi na te faia se faasalalauga i auala o fesoota’iga faaonaponei le social media, e faatatau i su’esu’ega i moliaga o loo tuua’ia ai lē sa avea ma faia’oga o le aulakapi o le Manu Samoa le susuga Mase Mahonri Schwalger.
O le amatalia o su’esu’ega o molimau o lea matauou tau faamasinoga i le Aso Gafua na faailoa ai e le afioga i le Faamasino Sinia o le Faamasinoga Maualuga, le afioga Vui Clarence Nelson, e lē gata ina faasā ona faasalalau i galuega a tusitala, ae faapea foi soo se tagata.
O le a faato’ā mafai ona faasalalau lenei mataupu pe a mae’a su’esu’ega uma a le Faamasinoga Maualuga.
