Tusia: Justin Fa’afia

Ua fa’asoa mai e ni faiaoga o le Iunivesete Aoao o Samoa ua fa’asaina latou e le Pule Sili ia Aiono Dr. Alec Ekeroma ona fa’asoa ni manatu e fa’atatau i mataupu o lo’o fa’afegai nei ma le faiga malo o Samoa.

I se tusi na ia tusia i le upega tafailagi agai i le vasega a faiaoga a le NUS, na fa’asaina ai e Aiono ona tautala seisi o Faiaoga ma Polofesa o le Iunivesete i le au tusitala pe fa’asoa foi ni o latou manatu i le upega tafa’ilagi.

I le fa’aliliuina o lea tusi e fa’apea: “Afai e fa’afeso’otai atu se tusitala, e tatau ona ioina muamua e le sui Pule ma le Pule Sili ni fa’amatalaga a’o le’i fa’asoa ina i tusitala.”

I le mau a se tasi o Faiaoga na talanoa mai i le Nofoilo Samoa, e fa’apea, e le talafeagai le pa puipui o manat o i latou e iai tomai i mataupu fa’atemokarasi ma fa’ale aganuu i le Iunivesete, ma o le aoga lea o latou tomai ina ia fa’asoa ma fa’alautele ai manatu am su’esu’ega a tagata lautele i mataupu o lo’o tupu mai i le tatou faiga malo.

O se mau a lea Faiaoga, e fesiligia ai le tutoatasi o le Iunivesete pe a fa’apea o lo’o taofiofi e Aiono manatu sa’oloto o Faiaoga, o le latou matafaioi lea ua ala ai ona avea latou ma Faiaoga, tagata su’esu’e ma Porofesa i le Iunivesete.

Na fa’asoa mai le Faiaoga e fa’apea ua fa’asa taputapu e Aiono ni Polofesa sinia ole Iuniveseta e iai tomai i le su’esu’eina o fa’afitauli i Atunu’u fa’atemokarasi fa’apea ma le aganu’u Samoa ma tulafono e fa’atatau i nei mataupu. Na taumafai le Nofoilo Samoa e fa’atalanoa Faiaoga Sinia o le Iuniveseta ae na fa’apea mai e le mafai ona latou talanoa mai i Tusitala.