O le taeao ananafi lea na faatautaia ai se sauniga i le ofisa tutotonu a le kamupani telefoni a le Vodafone Samoa e aloaia ai le faapaleina o le tamaitai ia Haylani Kuruppu o lē sa avea ma Tausala o Samoa i le tausaga ua mavae lea ua avea nei ma Tausala o le Kelope a Samoa auā faalagamaea o le sailia ai o se Tausala o le Kelope lea o le a tauva ai i Vietnam i le masina o Novema.

O lenei sauniga sa auai ai le afioga i le Sui Palemia, Afioga Tuala Tevaga Ponifasio ma saunoa ai i le lagolago malosi a le Malo i le auai ai o Kuruppu i lenei tauvaga.

“O loo lagolagoina e le Malo lenei faamoemoe aemaise o le savaliga o le a feagai ai ma le tamaitai ia Haylani a o tapena ai mo le tauvaga.

“O le tauvaga Tausala o le Kelope o se auala e unaia ai tamaitai e faaleo ai o latou lagona i nisi o mataupu e lotolotoi ai.

“E pei ona silafia o le amataga o le masina nei lea na faatautaia ai le sailiga Tausala o Samoa ma o le tauvaga tele lea a le atunuu e faatautaia i tausaga taitasi.

“E ui ina eseese nei tauvaga ma lona faatinoina ae e tutusa lava o la sini autu o le faalauiloaina o tamaitai aemaise nisi o mataupu tāua e mafai ona faasoa ai agavaa ma le sao o tamaitai e pei o puipuiga o le siosiomaga, faalauiloaina o tu ma aganuu aemaise le unaia o tamaitai i tofiga taitai.”

Na ta’ua foi e Tuala o se tasi lenei o faitotoa e faalauiloa ma maketi ai lo tatou atunuu i le lalolagi.

“O loo vaaia le silia ma le miliona o tagata o loo maimoa i lenei tauvaga ma o se tasi lenei o vaega e tāua tele e silafia ai e tagata o le lalolagi si o tatou atunuu ma lona atinae tau turisi.”

O le kamupani a le Vodafone Samoa o loo lagolagoina malosi lenei faamoemoe ma sa momoli ai le faafetai a le Malo e tusa ai foi o lenei faama’ite auā lava le atinaeina o tamaitai ma lo latou sao a o se avanoa e tauva ai i tauvaga tetele faapenei.

“I ni vaiaso ua tuanai atu sa asia ai Samoa e lē o loo pale mai i lenei tauvaga le tamaitai ia Shane Tormes ma o loo faapupula mai ai se itu tāua tele i tamaitai Samoa e maua ai lenei avanoa e tauva ai ma silafia foi le faatautaiga o lenei tauvaga i atunuu i fafo.

“Faafetai i le kamupani o le Vodafone Samoa mo nei avanoa mo tamaitai Samoa e le aumaua foi nei avanoa ma e momoli atu ai faamanuaiga mai le Malo o Samoa i le tamaitai ia Haylani ia manuia lou alo atu i lenei faalagamaea e faalauiloa ai Samoa i le kelope.”

Na saunoa Kuruppu i lenei tofiga ua tuuina atu ia te ia ma e ese foi lagona ina ua filifilia o ia i lenei tauvaga i le mae’a ai o lana tautua i le 12 masina ua tuanai a o avea ai o ia ma Tausala a le atunuu.

“O se fiafiaga tele mo a’u lo’u auai ai e tauva ma o se avanoa e le aumaua e silasila ai ma auai i le faatinoina o lenei tauvaga i lona aoao tetele e pei ona tatou matamata ai e le o se tauvaga laititi ae o se auala foi e tapue ai le tomai ma agavaa i faamoemoe faapenei.”

Na ia faailoa ai foi e lua vaiaso o le a faiamalaga atu ai i Filipaina i nisi o aoaoga tāua e patino lea i lenei tauvaga.

“Faafetai faapitoa ai i le Vodafone Samoa mo vaega uma o loo tapena ai e aofia ai le faimalaga atu i Filipaina e feiloai ma se tasi foi o vaega o loo iai le tomai ma le agavaa i tulaga o le tulai mai i le tauvaga.

“O nei aoaoga mo le lua vaiaso a mae’a ona toe malaga mai lea i Samoa ma tapena ai le auai atu i Vietnam i le masina o Novema.”

O le lagona ia Kuruppu o tauvaga faapenei a le lalolagi o se avanoa lelei lea mo tamaitai Samoa ia aua ne’i gata i le Tausala o le Pasefika ae ia faaauau atu i tauvaga a le lalolagi.

“E pei ona ou ta’ua e tele nisi o atunuu o le Pasefika o loo agai i tauvaga tetele faapenei e pei o le Atu Kuki ma New Caledonia a mafai e atunuu nei ona auai i tauvaga nei e telē le mafai ia Samoa e tauva ai ona o loo tele le avanoa ma le agavaa o a tatou tamaitai.”

E 75 atunuu o lea tauva i lenei tauvaga ma o loo ua amatalia ai nei tapenaga a le tamaitai ia Kuruppu faapea ai ma le Vodafone Samoa e tauaveina le tagavai a le atunuu mo lenei faamoemoe.