Ua faapafala se faasalaga e aunoa ma le faamaonia o le moliaga o se tama talavou 17 tausaga le matua ina ua mae’a ona ioe i le solitulafono na ia faia, o le faatupu o se mu na aafia ai se meatotino taugata o se pamu penisini.
Na taunuu le faamasinoga sili i lea faai’uga ina ua mae’a ona iloilo le talosaga a lana loia, ina ia faapafala se faasalaga e aunoa ma le faamauina o lona moliaga poo le discharge without a conviction.
Ua tapu ma faasā e le faamasinoga ona faailoa le suafa o lea taulealea, e oo lava i se faamatalaga e iloa gofie ai lona tagata, e mafua ona e itiiti ona tausaga e lē faatagaina i le tulafono.
O lē na molia e faamautu i Ausetalia ae na malaga mai e vaai se tina matua o lona aiga, ae o le masina o Fepuari o le tausaga nei na aga’i ai ma nisi i se taavale o se dyna e utu mai fagu penisinisi i le pamu na aafia.
A’o faia le galuega o le utuina o fagu pa’u penisini, faaalia e leoleo ia latou faamaumauga na tago lē na molia i le afi penisini ma tutu ma faapena ona apo ai e le afi ma mu ai loa le pamu penisini.
O le finauga a le loia sa tu mo le alii talavou na faia le gaioiga, e telē se aafiaga o lona lumanai a’oa’oina pe a faia se faasalaga faafalepuipui ae o le mea na tupu ua matuā lagona ai le salamō o le taulealea. Ua aumai foi le talosaga a ona mātua i Ausetalia e toe fia faaauau ana a’oa’oga i le Iunivesite.
O vaega uma nei na silasila iai le faamasinoga ma talia ai loa le talosaga e faapafala se faasalaga e aunoa ma le faamaonia o le moliaga. O lona uiga ua sa’oloto le alii na molia ma ua leai se faasalaga ma ua leai foi sona moliaga faasolitulafono.
O aafiaga o le pisinisi na aafia i le gaioiga a lē ua molia, ua faaalia i le faai’uga e ogaoga aemaise o seleni ua lē maua talu ona faatama’ia le pamu penisini i le mu.
