E 7.22% o le a sii ai pe faaopoopo tupe a tagata tala penisiona, tagata o loo maua penefiti faapea ai ma fanau aoga.
O le faasilasilaga lea mai le malo ananafi ma ua faia ai ina faafetaui ma le alu i luga o le inflation poo le alu i luga o le tau o oloa ma auaunaga faatusa i le fai ifo o le malosiaga o le tupe, ma o lea foi na sau i le asō na faailoa mai ai e le StatsNZ e 12% lea na alu ai i luga le tau o meaai e pei ona faamauina ia Fepuari, ma o se siitaga tele lea talu mai le 1989.
O ni suiga ua ta’ua e le Palemia Chris Hipkins o loo sau i totonu o le bread and butter package ina ia fesoasoani i aiga ma le taugata o le tau o le soifuaga ua iai.
E tusa ma le 1.4 miliona tagata Niu Sila o le a manuia i lenei suiga, ma o se suiga foi o le a aloaia faatasi ma le siitaga o le totogi maualalo i le aso muamua o le masina a sau.
O lona uiga mo le ulugalii o loo maua uma a laua super o le a faaopoopo le $103 i le lua vaiaso, ae $67 faaopoopo mo le tagata e toatasi o loo tala le penisiona.
O tagata tala penefiti e iai fanau o le a faaopoopo le isi tusa ma le $40.96 i le vaiaso.
O fanau aoga foi o loo agavaa i le alauni ua ta’ua o le student allowance o le a faaopoopo le isi $20, ma e faapea foi student loan living costs.
Mo tupe a tamaiti o loo maua e ta’ua o Working for Families o lea foi o le a alu i luga.
O le bread and butter o le a faaalu ai e le malo le $2 piliona, ese mai ai le $189 miliona lea foi e aloaia i le masina fou i suiga o le Childcare Subsidy.
