O loo alu pea i luga le fuainumera o tagata maliliu faapea tagata manunu’a ona o le mafuie tele na luluina ai Taiwan ananafi.
E oo mai i le taeao nei ua toaiva tagata maliliu ua faamaonia ma le silia ma le 800 tagata manunu’a.
O loo faasolo pea nei galuega laveai ma pe ā ma le 127 tagata ua lipotia e lē o mafai ona aumai i fafo ma le ana ua solo faapea nisi o fale.
E 7.2 le malosi o le mafuie e tusa ma faamaumauga a pulega i Taiwan ae 7.4 le fua a Amerika ma o lea na faalogoina ananafi i le taeao e tusa lea o le aoauli taimi Niu Sila ma faatoa toe faalogoina lea o se mafuie malosi tele i totonu o le 25 tausaga e pei ona gata ai i le mafuie 7.6 i le 1999 lea na fasiotia ai le 2,400 tagata Taiwan ma le tele o fale na faaleagaina ai.
Ae i tagata Niu Sila o loo maua i le lesitala a le matagaluega a le va i fafo o loo iai nei Taiwan i le taimi o le faalavelave faalenatura, e 158 ma e lē o iai ni lipoti o nisi ua faamanu’alia po ua faatalosagaina se fesoasoani.
O le mafuie lava lenei e tasi na sau ai ma lapataiga o le sunami mo motu i Saute o Iapani faapea Filipaina.
