E 88 tausaga o le soifua o se tina matua ua faailoa e le matagaluega o le soifua mālōlōina, ua faaopoopo i le numera o i latou ua faamaonia ua maliliu ona o āuga o le faama’i Koviti-19, ma faamauina ai le to’a 28 o tagata i Samoa ua maliliu talu ona pesia le lautele o tagata i le siama o le faama’i korona vairusi.

O le lipoti lata mai ua faailoa ai e le soifua mālōlōina e to’a 263 tagata na aafia i le faama’i ia latou faamaumauga o le fā aso mai le aso 3 i le aso 7 o Iuni. O le to’a 255 e mai le mamalu lautele o le atunuu ma le to’avalu o pasese na malaga mai fafo.

Ua siitia ai le numera o ē ua aafia i le Koviti-19 poo le korona vairusi i le 14,187, ae talu mai lea fā aso ua mavae e valu gasegase sa taofia i nofoaga faapitoa i le maota gasegase i Motootua ae leai nisi sa taofia i potu mo gasegase tigaina. O le tina matua 88 tausaga o le soifua ua faaopoopo i le aofaiga o ē ua maliliu i le faama’i i Samoa e leai ni ona gasegase tumau ma e lei faia foi ni ona tuipuipui o le faama’i. O le aso 7 o Iuni na maliu ai le tina matua.