Ua toe o se aga ona amatalia lea o le faamoemoe o alogavaa a le lalolagi lea o loo talimalo ai Samoa ma o loo ua mafai ona faagaioi lenei taligamalo e ala i le fesoasoani ma le lagolagosua a le Malo o Samoa faatasi ai ma nisi o kamupani ma pisinisi i le atunuu. 

E tolu kamupani e aofia ai le kamupani telefoni a le Digicel, Pulega o Uafu ma Vaa a Samoa ma le kamupani o le Vailima lea ua tuuina mai la latou lagolago i le asosi alovaa a Samoa lea o loo gafa ma le faatinoina o tapenaga o le faamoemoe. 

I le feiloaiga ma tusitala ma le aufaasalalau na faafetaia ai e le Peresitene o le asosi Toaigaoaloalii kamupani uma e 21 mo le tuuina mai o le tau’au e lagolagoina le taligamalo a Samoa. 

“E tele nisi o vaega eseese o loo tuuina mai ai le fesoasoani a pisinisi ma kamupani i le atunuu ma e faafetaia ai foai eseese ua tuuina mai ina ia manuia le faamoemoe o loo tapena ai.” 

Na faailoa e le Ofisa Sili o Pulega a le kamupani telefoni le Digicel Samoa, Anthony Seuseu le tāua o lenei faamoemoe mo Samoa ma lona tamaoaiga. 

“O le lagolago lava ia a le kamupani e faia pea mo soo se faamoemoe faavaomalo e faia i Samoa nei e faalauiloa ai a tatou tu ma aganuu aemaise ose auala lelei lea e atinae ai le tamaoaiga o Samoa.” 

” O le pitolaau ale kamupani o le faasalalauina lea o lenei faamoemoe ina ia mafai ona maimoa uma ai le lalolagi i lenei faagatama.” 

Na faaleo ai foi le faafetai a le Peresitene o le asosi o Vaa a le lalolagi, Lara Collins i tapenaga a Samoa auā le sologa lelei o lenei faamoemoe. 

E silia ma le 1000 i latou o le a auai i lenei faagatama ma o loo ua i Samoa nei nisi o ‘au mai atunuu e mamao.