Ua lipotia nei le toe faaopoopo ai o ni moliaga a leoleo faasaga i se alii na taofia ma molia muamua, ina ua mae’a sa’iliga a leoleo i se fale i Glen Eden e masalomia e iai sootaga o lea alii i lea fale.
O lē o loo aafia nei i le tulafono, o loo molia e leoleo ina ua maua ai se ‘au’upega mata’utia poo se fana i le ituaiga o le sawn-off shotgun, ma ni fualaau faasāina ma tupe i New Lynn ina ua taofia e leoleo a o aga’i atu i lana taavale.
Ae mo le nofoaga i Glen Eden, na maua ai e le vaega o le Waitematā Gang Disruption Unit a leoleo se fana i lona ituaiga o le 22 calibre rifle, o ututau poo pulufana, o fualaau faasāina o le
methamphetamine, ma le maruana ma nisi o vaega poo aitema o loo taga’i iai le auaunaga na maua i lea nofoaga.
Ta’ua e le alii satini sinia, o se leoleo su’esu’e faapitoa, Detective Senior Sergeant, Josh Lautogo, o lea galuega o se pine faamau lea i le galulue malosi o le auaunaga ina ia faalavelaveina ma taofia le tele o gaioiga faasolitulafono a kegi poo gangs mai le oo mai totonu o le atunuu, ae ia maua se atunuu saogalemu ma le sa’oloto mai soligatulafono; ma le malupuipuia o tagata.
Na ia tula’i mo le ulua’i taimi i luma o le Faamasinoga Faaitumalo, le Waitākere District Court i le aso 23 o Setema, ma na taofia i lalo o le vaavaaiga a leoleo, ma e faamauina o le a toe tula’i o ia i luma o le faamasinoga i le aso 20 o Oketopa e tali i ona moliaga na mua’i molia ai o ia faapea ai ma moliaga fou e pei ona toe faaopoopo atu nei.
Puna o Faamatalaga: https://www.facebook.com/share/p/14Knw5H4cHY/
