O le a faaopoopo leoleoga a leoleo i nofoaga o loo tele mai ai soligatulafono.
O le tala lea mai le komesina o leoleo Andrew Coster ma ua sau ai a o suesue pea le fasiotia o le faatauoloa i Aukilani e pei ona iai i le vaiaso talu ai.
O se maliu na faia ai ma solo tetee a le toatele o faipisinisi ma nisi lava o le komiuniti agai i ofisa o le Palemia faapea lona sui i Aukilani ma Ueligitone ananafi, ae o nisi na tapunia faleoloa mo nai itula e manatua ai le alii Initia ia Janak Patel lea ua fasiotia.
Ae i se finagalo mai le komesina o leoleo, o le a faaopoopo leoleoga a leoleo e le gata o taavale ae faapea leoleo feoai i nofoaga o loo faia ai faatau ma tua i le komiuniti.
E le gata i lea o le a faalautele foi le polokalame o loo taulai lea i solitulafono e fesootai ma kegi lea na faapea e faauma ia Tesema, peitai o lea ua toe faaauau seia oo atu i le tausaga fou.
