E to’a 66 tagata ua faaopoopo nei i le numera o i latou ua maua i le siama o le faama’i talu mai le 24 itula ua mavae ma ua oo atu ai nei le aofaiga o i latou i Samoa ua maua i le siama i le to’a 262.
O lea fainumera o loo aofia ai ma le to’a 15 o i latou na aafia muamua mai le faigamalaga mai Niu Sila i le Aso 6 o Mati 2022. O le to’a 66 ua faaopoopo ua maua ai le le aofaiga e to’a 247 o tagata mai le lautele o le atunuu ua maua i le siama o le koviti19.
E tusa ai o le ripoti lata mai i le po anapo mai le auaunaga a le Soifua Maloloina faapea le Komiti o le Faalavelave Faafuasei ua faamauina ai e 1,510 suega poo tests sa faatinoina i le Aso Gafua 21 o Mati i nofoaoga faapitoa e 17 faatasi ai ma nisi o nofoaga faapitoa i le Soifua Maloloina.
O faamaumauga foi a le Matagaluega ua oo atu ai nei i le to’a 257 le aofai o tagata i Upolu ua aafia ae to’a 5 i le motu tele i Salafai, ae mo Manono Tai ma Apolima Tai e le’i maua ai lava ni tagata aafia. E leai se tasi o taofia i le potu tigaiga i le falemai o Tupua Tamasese Meaole i Motootua.
O faamaumauga ua tuuina mai e le’o faailoaina ai pe to’a fia alii ae fia tamaitai ua faamauina nei ua maua i le faama’i e faapea foi i tausaga o lo latou matutua. Ua faailoa e le Matagaluega o le Soifua Maloloina o le taimi nei o loo faaauau pea suesuega ma sailiiliga mo i latou e to’a 428 na feso’ota’i vāvā lalata i a’i latou ua aafia nei i le siama o le faama’i.
