Ua faailoa i lipoti i le One News i le asō le faaopoopo o le aofai o tagata i Aukilani i Saute ua oo atu i le tai fa masina le umi e faatali ai mo se avanoa i fomai faapitoa poo specialists ma ua avea lea o se avega faaopoopo i le health system e pei ona saunoa iai se tasi e finauina avanoa mo gasegase.
O le lipoti ma faamaumauga sa faamatuu mai e le Te Whatu Ora i le faaiuga o Setema ua faailoa ai e 4,711 tagata i Counties Manukau sa faatalitali mo le tai fa masina pe sili atu foi ina ia maua ai se avanoa i se fomai faapitoa.
Fai mai le lipoti o le faamoemoe ina ia mafai e le gasegase ona maua le avanoa i le fomai faapitoa i totonu o le fa masina talu ona refer iai e le fomai.
O le taItaifono la o le Patient Voice Aotearoa o Malcolm Mulholland na ia ta’ua o faatuai nei o se faailo o se auaunaga ua i se tulaga faaletonu.
Fai mai a ia e silafia uma e tagata o le vave ona togafiti o se gasegase o le vave foi lea ona maua o le fofo.
I lea lava lipoti ua faailoa ai ma se finagalo o le sooupu a le National i mataupu tau le soifua maloloina Dr Shane Reti e faapea o faamaumauga mai le Te Whatu Ora o faamaumauga aupito le lelei ia ua ia vaai iai mo Counties Manukau.
