A o iai le Palemia o Niu Sila i Peretania, ua ia faailoa o le a faaopoopo fesoasoani a Niu Sila mo Ukraine.
O lea na asia e Chris Hipkins le ami a Niu Sila o loo koleniina fitafita Ukraine i Peretania ma ua fai mai ai o le a toe faaopoopo le umi e auina atu ai sui o le Defence Force mai Niu Sila seia oo i le faaiuga o Iuni o le 2024.
O le taimi lava foi lea o le a toe faaopoopo ai le isi toalua mai Niu Sila nei e faia polokalame faaleaoaoga ua ta’ua o space training programmes mo sui o le ami a Ukraine i Polani.
O lea ua silia ma le tausaga o tu malosi Niu Sila e fesoasoani i tagata Ukraine a o iai pea i le taua ma Lusia e pei ona amata faia mai ai mai ia Fepuari o le 2022.
I totonu o lea taimi umi ua silia ma le $78 miliona fesoasoani tupe faapea fesoasoani a le militeli a Niu Sila.
O le faasilasilaga a Hipkins o loo iai foi ma fesoasoani tupe e silia ma le $5 miliona e fesoasoani ai i le itu tau soifua maloloina o tagata Ukraine, meaai, vai taumafa, tagata sulufai faapea le tele o polokalame fesoasoani.
I faamaoniga mai le malo ua silia ma le tasi afe fitafita Ukraine ua mae’a koleni e fitafita Niu Sila, ma o loo tumau lava foi le leai o se fitafita Niu Sila o loo auina atu i Europa mo toleniga nei e ulufale atu i le taua o loo faia i Ukraine.
