O le au fai taavale e sosola ma leoleo, ia nofo sauni e lusi lau taavale, o se faamatalaga lea o loo ta’ua mai e le minisita o faamasinoga i le lipoti e faatatau i se faiga fou o faasalaga ua faamamafa mo i latou o le au fai taavale e le tu ane pe a taofi atu e leoleo pe musu foi e fesoasoani i leoleo i le sailia o se avetaavale e sola ese ma leoleo.
O isi vaega o suiga nei e pei ona faalauiloa o le faasalaga aupito umi pe faaleaogaina le laisene o le avetaavale pe a le tu i leoleo ua siitia atu nei i le 24 masina lona uiga ua 2 tausaga.
O se taavale o le a mafai ona aveesea tumau mai se avetaavale ua faamaonia moliaga o le lē tu i leoleo ma o le a mafai e leoleo ona ave se taavale mo le 28 aso pe afai e musu le avetaavale pe lē tuuina ane foi faamaumauga sa’o e uiga ia te ia.
Fai mai le minisita e iai tulaga e malupuipuia ai avetaavale e usitai i le tulafono ma mafai ona o latou faamaonia o a latou taavale na gaoia i le taimi na ave ai e leoleo sea taavale ma o le a iai foi le avanoa e apili ai.
Fai mai le minisita o leoleo o le faiga lea o le a tuuina ai malosiaga faaopoopo i leoleo e feagai ai ma ituaiga amioga ia e ono oo ina aafia ai soifua o tagata i luga o alatetele.
