Ua faaopoopo e le NZ Rugby se taaloga ma Iapani i Tokyo ina ia aofia ai i lana malaga taamilo i le Northern Hemisphere ia Novema.
E lē o faailoa maia i le taimi nei nisi faamatalaga e tusa o lea faai’uga ae o loo sauni pea ma tapena le All Blacks mo le latou fetauiga lona lua ma le ‘au malosi a Aferika i Saute lea na faia’ina ai i le vaiaso talu ai.
Fai mai le faia’oga i se faatalanoaga i le televise a Niu Sila e na te iloa ua faatino le tulaga sa mana’omia e le ‘au ona faia ina ia faasao ai le vaega o loo aga’i iai i le taaloga lea lona lua.
E iai suiga sa faalauiloa e le faia’oga i le aga atu i le taaloga lea e aofia ai le aga’i ane o Richie Mounga i le numera 10 muamua ia Beauden Barrett. O le alii o Fletcher Newell le isi o le a taalo mo le uluai taimi i le All Blacks ina ua valaau e sui tulaga ia Ofa Tuungafasi o loo manu’a.
O le taeao o le Aso Sa o muamua le fetauiga lea a le All Blacks ma le Springboks.
