O se tala fiafia tele, le toe faaopoopo atu o se tasi o sui o le atunuu i le numera o le autaaalo ua saofagā atu mo taaloga o le Olimipeka o lenei tausaga 2024.
O le tamaitai ia Vaimo’oi’a Ripley o se tasi o alo Samoa e tausinio i le taaloga o le tuuga vaa failā (sailing) ma o le aso ananafi na faamautinoa mai ai le maua o le avanoa e fai ai ma avefu’a o Samoa i lea taaloga faavaomalo i le masina o Iulai 2024.
Maitauina foi le salalau ai i luga o upega tafailagi o sa’afi’afiga ma upu faamalo a le toatele o aiga ma uo ma paaga o lenei tamaitai e tusa ai ma lenei matati’a ua ia ausia.
Faaalia o Vaimo’oi’a Ripley o le a tauva mo Samoa i lalo o le vaega ua ta’ua o le Women’s Single Dinghy ILCA 6 Sailboat division, ma o le a ia tauva ai ma atunuu e 42 o loo tausinio i lea faagatama i le Olimipeka i Pale i Farani.
