E na o le ono gasegase o le fiva ponaivi na faamauina i le vaiaso na te’a nei e le auaunaga a le soifua mālōlōina, ma ua faaitiitia ai le numela o tagata i Samoa na aafia i le dengue fever poo le fiva ponaivi.
Ua faailoa lautele ai nei e le matagaluega o le soifua mālōlōina le faamuta poo le mae’a ai o le pipisi o lea faama’i i lo tatou atunuu, lea sa amata mai ia Oketopa o le tausaga na te’a nei.
O faamaumauga talu mai lea taimi na pipisi ai le fiva ponaivi e 496 tagata na faamaonia le maua i auga o le gasegase, ae e leai se soifua na ma’umau ai.
Ua ave ai le faafetai a le matagaluega i le lagolago a le atunuu i le tausisia ma lapata’iga mo puipuiga i le faamamā o nofoaga e nonofo ma tau tuufua ai iniseti o le namu, faapea le fesoasoani na fana ai nofoaga sa pito maualuga le numela o tagata na aafia ai i le fiva ponaivi.
