Ua teena ma lē talia e le Faamasinoga Maualuga i sana faaiuga le talosaga sa tuuina atu e le kamupani o le South Pacific Car Rental Ltd lea o loo i Vaimoso, sa finauina ai se poloaiga lē tumau e taofia ai le faagaioia o le pisinisi i luga o se fasi fanua fa’aleaganu’u sa lisi ai mo le 10 tausaga i le nofoaga o loo iai nei.
Ua teena lea talosaga ona ua faamalieina le faamasinoga e lei tausisia e lē e ana le pisinisi aiaiga o le faafouina o le lisi lea sa maea i le tausaga e 2020.
O le iloiloina o le talosaga mo se poloaiga lē tumau sa silasila ai le faamasinoga i mau uma sa tuuina atu e itu e ono sa tuuaia e le kamupani lea sa molia ai ma lē e ana le fanua, faapea mau a le kamupani.
Na taunuu le faamasinoga i sona finagalo e lē taunuu i se tulaga manumalo le finauga a le itu talosaga ona ua manino i mau ua soli e le itu talosaga aiaiga o le tulafono o le lisiina o fanua faaleaganuu.
Sa talosaga le itu tagi i le faamasinoga e tuu atu se taimi e tau atu i le masina o Oketopa o le tausaga nei e tala ese ai a latou meatotino mai le fanua, peitai ua le talia ae ua ave le tuualalo a le faamasinoga i lē e ana le fanua ma le Minisita o le Matagaluega o Punaoa Faalenatura ma Siosiomaga e feiloai ai ma soalaupule i se agaga lelei le tuuina atu o se taimi i le kamupani e tala ma aveesea ai uma a latou meatotino mai le fanua.
