E lē o toe mamao faamuta le faatupeina e le malo o femalagaa’iga o loo feoai fua ai nei fanau, ae ‘afa le tau o pasese mo talavou e i lalo o le 25 tausaga.
O le a amata aloaia mai le faaiuga o le masina a sau ona toe foi le toatele o fanau aoga faapea talavou i le tau masani e totogi mo femalagaa’iga lautele, ma o le tele o aai i totonu o le atunuu o suiga nei e aloaia mai le aso muamua o le masina o Me.
E lē o aafia i le suiga lenei le pa’ū o pasese o loo ofoina mai e puleganuu poo Councils, lea e aofia ai fanau aooga i iunivesite ma i latou o loo i kolisi.
E oo lava foi i tagata matutua ma i latou e iai Community Services Cards, e tumau lava le ‘afa o pasese e pei ona masani ai.
Ua sau ai ma le fautuaga i le toatele, e siaki pe lē faamata o mafai ona agavaa i Community Services Cards ina ia maua ai lea fesoasoani.
Ae mo tupulaga i Kalaiesetete, ua lipotia e tumau lava le na o le ‘afa o le tau o pasese e totogi, poo lea lava o le a faaauau lea faamāmā avega e ui i le suiga ua fai mai ai le malo.
O le paketi o le 2023 i lalo o le faigamalo a le Labour, o lea o loo feoai fua ai nei fanau e i lalo o le 13 tausaga faaaogaina femalagaiga lautele, ae na o le ‘afa o le tau o pasese e totogi e le 13 e oo atu i le 24 tausaga.
I le tele o aai i totonu o Niu Sila, o lea lava ua toe foi le toatele o tagata feoai e faaaogāina auaunaga a pasi e pei ona sa iai a o lei oo mai le Koviti.
E tusa ma le faitau selau afe fanau faapea tupulaga talavou o loo faaaogāina auaunaga a pasi, train faapea vaa feoai i le sami lea o le a aafia i le suiga ua faailoa mai.
