E lē o le galuega lea na saini maliega iai le Pule Sili o le Kainga Ora, ae o lea ua faamavae.
O lea ua faamautinoa mai ua faamavae le Pule Sili ia Andew McKenzie ma o le faai’uga o le masina o Oketopa e aloaia ai i le uma ai o le valu tausaga o lana tautua.
E tele suiga na sau ma le faigamalo fou o loo iai nei faasaga i le Kainga Ora, ma le tala o loo agai mai pea isi suiga lea ua faailo mai i le mae’a faia o le suesuega tutoatasi faasaga i le Kainga Ora.
O lea suesuega tutoatasi na ta’ita’ia lea e lē sa avea ma Palemia o Niu Sila i tausaga ua alu, Sir Bill English, ma sau ai ma le tala ua gau le Kainga Ora ma e lē mafai ona ausia sini e ala i le fausia o fale o loo moomia.
O se iloiloga na faia ai loa e le Kapeneta suiga mo le Kainga Ora ma o nisi o nei suiga na aloaia ai lava i lea taimi ma o suiga nei ua fai mai le Pule Sili, e lē o mea nei na malie iai i le taimi na toe faaopoopo ai le taimi o lana konekarate faapule sili i le tausaga talu ai.
Puna o Faamatalaga: Kāinga Ora chief executive Andrew McKenzie quits over Government overhaul | Newshub
