Ua faamavae le Ofisa Sili o le Pulega a Aukilani poo le Auckland Council o Jim Stabback ona o ni mafuaaga patino ia te ia ma lona aiga.
O lea tulaga ua faamaonia mai i le folasaga a le pulenuu o Aukilani Wayne Brown na faia i le taeao analeila ma ia ta’ua ai o le matafaioi tauave a Stabback e le faigofie ma o se tasi o galuega e tele ona luitau faataitai.
Na muai avea Stabback ma Ofisa Sili i le masina o Setema 2020 na sui tulaga ai ia Stephen Town ma sa amata tonu mai lana nofoaiga i le taimi o le malosi o le pepesi a le koviti ma nisi o sā o le koviti.
E faafetaia ai e Brown le sao o Stabback i le pulega aemaise o tagata uma o Aukilani ma ua ia faailoa foi e le o toe mamao se taimi ona sailia foi lea o se tasi e suitulaga i lea tofiga tāua.
