I tausaga e tele sa galulue ai faafeagaiga e toa sefulutasi ma o latou faletua i le tausia o aulotu o le Ekalesia Faapotopotoga Kerisiano Samoa sa galulue ai, o le tulalata i le faaiuga o le fonotele o lenei tausaga, na faia ai le sauniga lotu i le Malumalu o le Iupeli i Malua e faamavae atu ai i ia faafeagaiga ma o latou faletua ua aulia tausaga o le soifua e malolo penisione ai.

E toalima faifeau i Samoa, toafā i Niu Sila ma le toalua i Ausetalia ua malolo penisione.

O faafeagaiga e toa sefulu tasi ua ausia lea laasaga tāua o le soifua galue i le galuega faafaifeau ua aofia ai faifeau toeaiina e toalua.

O i laua ia le susuga i le toeaina Alosina Leatualevao ma le faletua ia Otaota Sapatu Vavae sa galulue i le aulotu EFKS i Papatoetoe i Niu Sila, ma le susuga i le toeaina ia Roma ma le faletua o Wilma Enosa, sa galulue i Samoa i le aulotu EFKS i Manunu.

O isi faafeagaiga ua penisione o le susuga Auvaa Eneliko ma le faletua i a Anofale Eneliko sa galulue i le aulotu i Avondale i Niu Sila, susuga Dr Eletise Suluvale ma le faletua o Rosa sa galulue i le aulotu i Toamua, Esekia Peneueta ma le faletua o Asofiafia sa tausia le aulotu i le afioaga o Lepea.

O le susuga Iakopo Manutai ma le faletua ia Peleiupu sa galulue i le aulotu i Rotorua Niu Sila, susuga Ioane Aloalii ma le faletua ia Silaumua sa galulue i le aulotu o Morayfield i Kuiniselani Ausetalia, susuga Sami Tuutuu Tofaeono Williams ma le faletua o Semurana sa tausia le aulotu i Sinamoga.

O le susuga Meki Lauvi ma le faletua ia Maria sa galulue i le EFKS i Masterton i Niu Sila, Nuuausala Cowley ma le faletua ia Mutaaga sa galulue i le aulotu i Riverstone i Niu Sa Uelese i Ausetalia, ma le faifeau o Harima Lemamea ma le faletua o Maturi sa galulue i le tausia o le aulotu EFKS i Salimu ma Musumusu i Fagaloa.