O le asō na faasilasila faalauaitele mai ai e lana afioga i le Tamaitai Palemia, Hon Jacinda Ardern, lana filifiliga o le a faamavae mai lona tofi Palemia faapea lona tofi o le ta’ita’i o le Vaega Faaupufai a le Labour.
O lenei suiga o le a aloaia e le silia le amataga o le masina fou o Fepuari.
Saunoa Ardern e leai se mafuaaga faapitoa o lana filifiliga, vagana ai lona ta’ua i lana faasilasilaga, o lona tulimata’ia o le taimi o le a tele ai sona avanoa e mafuta atu ai i si ona aiga.
Na faasino tonu lana tala i si ona alo le teineititi o Neve, ma faapea atu, ua tulimata’ia e Mum le taimi i le tausaga fou o le a amata ai ona e aoga, e ta te o e momoli oe i le aoga.
Na faapea foi ona ia folafola i lana paaga le alii o Clarke Gayford, ua oo mai le taimi ua tatau loa ona la faaipoipo.
O le aso 4 o Oketopa i le tausaga lenei o le a faia ai le faigapalota lautele a le atunuu ma toe sailia ai sona taitai, poo le Palemia, peitai pe afai nei o le a tuua e Ardern le tofi Palemia, e atoa i ai le lima ma le ‘afa tausaga talu ona tulai mai i le tofiga Palemia o Niu Sila.
Na ta’utino e Ardern lona agaga faafetai i le faatuatuaga na lafo atu e tagata o Niu Sila mo ia na te taitaia ai le malo, ma sa lei māmā ia te ia lea faaeaea maualuga sa ia tauaveina.
