O le malumalu o le Ekalesia Katoliko i Mulivai i Apia na faia ai sauniga faalemalo mo toe sauniga e faamavae atu ai i le afioga i le alii sa avea ma faipule o le Palemene o Samoa, le susuga John Olaf Jacob (Jack) Netzler ae o se minisita foi o le Kepeneta i nisi o paeaiga ua mavae atu.
O le Tamaitai Palemia, Afioga Fiame Naomi Mata’afa na fofogaina le molimau autū a le Malo ma faaleo le faafetai i le nofoaalo e tusa ai ma le tautua a si o latou tuaa ia Samoa e tauala i ona tofiga faafaipule, ae tainane foi isi faalapotopotoga sa galue ai, ae o le Sui Palemia, Afioga Tuala Iosefo Ponifasio na tauaaoina atu le tagavai a le atunuu i se tasi o alo o Netzler e fai ma meaalofa a le malo e pine ai le tautua a si o latou tuaa ia Samoa.
O John Olaf Jacob (Jack) Netzler na avea ma sui faipule e to’alua i ai faipule mai afioaga tu taulaga ma tagata palota ta’ito’atasi ma le au afakasi e pei ona sa ta’ua ai i paeaiga ua mavae.
O le tausaga e 1981 na ulufale ai Netzler i le Palemene a Samoa ina ua manumalo mai le faigapalota laitiiti na toe saili ai se sui lona lua o tagata palota ta’ito’atasi ina ua maliufasia faafuase’i le alii faipule sa tulai mai lena taimi, le susuga Ron Berking.
O le faigapalota lautele a le atunuu i le 1982 na toe manumalo mai ai Jack Netzler ma faaauau ai lava ona toe manumalo mai i le tofi faipule seia oo ina mālōlō litaea i le tausaga e 2001.
E tele matagaluega a le malo sa tofia i ai o se minisita, e pei o le Minisita o Faato’aga, Minisita o Fela’ua’iga, Minisita o Galuega, ma le Minisita o Vaalele Sivili.
O le aso 2 o le masina lenei o Aokuso, na maliu ai Jack Netzler, i le 82 tausaga o lona soifua. Na faaipoipo atu Netzler i lona faletua ua tuua foi le malo, o Leinatioletuitoga Cecilia Pereira Netzler, ma e to’alima o la alo, 26 grandchildren ae to’a 10 great-grandchildren.
O alii malu o le malo na latou tauaveina le sa o le susuga Jack Netzler mai le malumalu ma le toe agai atu i lona oliolisaga tumau.
