Ua tuuina mai nei e ala i se faasalalauga faalaua’itele i luga o upega tafa’ilagi e le ‘aulakapi liki a tama’ita’i le Fetu Samoa, le faamavae aloa’ia ai o le faia’oga ulu a le ‘au ia Jamie Soward mai le tauaveina o lea tofiga.
O se faamatalaga ua mau eseese ai tagata, o nisi ua fesiligia pe aisea ua faamavae ai a ae o lea ua lalata mai taimi o le Ipu a le Lalolagi.
O nisi ua taumatemate pe o iai foi ni faafitauli tau seleni ua feagai ma ‘aulakapi liki, e pei ona fetaia’i ma le iuni lakapi.
E ui i ia taumatematega, o manatu faaalia a tagata lautele, ae o lea na molimauina lava le faafetaia ai e le to’atele o le tautua a lenei tamalii aemaise o le mata’ina o taumafaiga a le ‘au a tama’ita’i Samoa i le tausaga e 2023.
Ta’ua e le asosi o le Lakapi Liki a Samoa lo latou faanoanoa tele i le faai’uga a le alii o Soward, peita’i latou te talia, ma e tumu i le faaaloalo i lea tamalii ma lana faai’uga i itu faapolofesa poo vaega tau i le galuega faapea tulaga faaleaiga.
Ua faafetaia e le asosi Soward mo lana tautua aemaise o ana taumafaiga i le atina’e, aemaise o le saga faaleleia o vaega uma o le taaloga mo le ‘au a le Fetu Samoa.
Na faaopoopo mai foi le Lakapi Liki a Samoa, talu ai o lea ua amata faatino galuega ma fuafuaga mo le Ipu a le Lalolagi i le tausaga lenei 2026, ua latou faamaonia o le a faailoa mai i se taimi o i luma lē o le a se’ei mai i le tofiga o le faia’oga ulu o le ‘au a le Fetu Samoa.
Puna o Faamatalaga: https://www.facebook.com/share/p/16weRPZjMA/
