Ua mae’a ona valaau i le Faamasinoga Maualuga i le Aso Lulu ma le Aso Tofi o lenei vaiaso mo le valaauga muamua poo le first mention,matāupu i talosaga poo tagi e valu o moliaga o faatosina solitulafono e māfua mai i le faigāpalota tele ia Aokuso.
Ua faamautū ai le faaauau ona su’esu’eina o ia matāupu uma e amata i le aso 14 o Oketopa le Aso Lua lea o le vaiaso fou pe a mae’a le Aso Gafua o le aso mālōlō o le Lotu a Tamaiti.
O le tagi mai le itumalo faapalota o Safata 1 o se tasi lea o matāupu o le a talamalae i le Aso Lua e amata ai su’esu’ega o ia tagi.
O le talosaga sa faaulu mai i le itumalo o Vaimauga 2 e iai se matāupu e muamua su’esu’e e pei o se talosaga mai le itu o loo molia ina ia faalēaogā le tagi o moliaga faasaga i le sui faipule le tofa Lenata’i Victor Tamapua ona na tuai ona faasalalau e le itu tagi le talosaga e tusa o aiaiga o ia matāupu.
O le Aso Lulu o le vaiaso a sau e fofogaina ai lea talosaga, ona iloa lea i se faai’uga pe faaauau ona tagofia lea tagi o moliaga o faiga faaalatua e māfua i le faigapalota.
E ui ina o loo taoto lea talosaga mo se su’esu’ega muamua a le faamasinoga, ae ua faatulaga e tasi le vaiaso e su’esu’eina ai lea matāupu e pei ona sauni mai le itu tagi ma molimau e 19, ae o le itu o loo molia e 49 molimau.
O lea aofa’iga e 49 ua aofia ai molimau a le itu o loo molia e tali ai i tuua’iga o faiga faaālatua, ma molimau e lagolago ai moliaga a le itu o loo molia e faasaga i lē na usu i le faauluina o moliaga poo le petitioner le afioga Tamaleta Taimang Jensen.
O tagi uma e valu ua faatulaga e oo atu i le masina fou o Novema o loo faaauau pea ona tagofia e le faamasinoga, ma iloa ai se aso e fofogaina ai faai’uga.
O le taimi nei e leai se matāupu o iai se fuafuaga e toe faasolomuli i tua.
E fā tagi a sui sa tauva mo le vaega faaupufai e puipuia aiā tatau a tagata o loo molia ai sui faipule o le vaega faaupufai o le Faatuatua i le Atua Samoa ua Tasi lea o loo aafia ai Minisita e to’alua ma se minisita lagolago e to’atasi faapea ma le Fofoga Fetalai o le Palemene.
O le isi sui faipule o le Faatuatua i le Atua Samoa ua Tasi o se isi minisita o le Kapeneta o loo molia i le tagi a se sui tama’ita’i sa tauva faatuto’atasi mai le itumalo o Falealili 2.
E tolu tagi a sui sa tauva mo le Faatuatua i le Atua Samoa ua Tasi o loo molia ai sui faipule e to’atolu o le vaega e puipuia aiā tatau a tagata sa manumālō mai i filifiliga a itumalo o Faasaleleaga 2, Faasaleleaga 3, ma Vaimauga 2.
